Terwyl ek vanmiddag op my WordPress beheerpaneel die nuutste Afrikaanse artikels lees, kom ek op hierdie absolute juweel van ‘n artikel af oor die goeie herinnerings wat baie van ons het oor Kersfees uit ons kinderdae en die verre verlede.
Soos wat hierdie vrou tereg opmerk, was dit nog ‘n tyd toe niemand gekla het oor die oorkomersialisasie van Kersfees nie, toe mense nog bymekaar gekom het en die beste van die feesseisoen gemaak het. Geen Geen geskenk was te gering nie en selfs eenvoudige geskenke kon jou soms ‘n traan laat wegpik net omdat dit uit die hard uit kom en uit die bietjie wat sommige mense gehad het, gekom het.
Ek onthou self nog die wonderlike Kersfees, oujaars- en nuwejaarsvieringe uit my jonger dae. Ek onthou nog die lang skoolvakansies op die plaas, Al die voorbereidings vir die hele feesseisoen wat mens vir dae aaneen besig hou. Die slaggoed wat geslag word, die vleis wat bewerk word en die wors wat gestop word. Die kleinkoekies van allerhande soorte wat gebak word. Die groot dag wanneer ons die werkers inneem dorp toe om hulle eie inkopies te gaan doen vir Kersfees. Die pakkies wat opgemaak word vir Oukersdag en die groot uitdeel wanneer almal op die werf bymekaar kom. Die kinders wat koeldrank kry en die grootmense wat kon kies tussen koeldrank of ‘n beker rantsoenwyn. Ons het ook self nog die tradisie van die kussingslope gehad op die beddens se voetenent. Die verrassing van Oukersaand as jy jou geskenk kry wat jy vir Kersvader in ‘n briefie gevra het of daardie tye wat jy nie self gevra het nie, maar hy het presies geweet wat jy nodig het.
Verder was daar ook nog die kuier op Kersdag by familie, die weersiens na ‘n lang tyd, Die koue etes vir Kersdag wat bestaan het uit koue vleise, hetsy dit nou varkboud, skaapboud of selfs koue kalkoen of hoender was. Dan die koue slaaie soos wortelslaai, aartappelslaai, beetslaai ensovoorts. Die tiekiepoedings met eensentstukke, tweesente en vyfsente in. Dit was nog in die ou dae voordat daar koper in die munte was en mens dit nie meer so kon doen nie.
Ek onthou nog die dae toe daar selfs op die radio en televisie spesiale Kersprogramme was. Gelukkig het RSG nog steeds spesiale programme op Kersdag en Goeie Vrydag. Maar in die ou dae het selfs die streeksradiodiens, die toenmalige Radio Oranje, vandag OFM, op Oukersaand en Kersdag spesiale Kersliedere gespeel.
Verder was Oujaarsdag en nuwejaarsdag spesiaal. Die oujaarsaand braai, die kerkdiens op oujaarsnag, die spesiale oujaarskonserte wat op RSG en sy voorgangers, Radio Suid-Afrika en Afrikaans Stereo uitgesaai is. Die streeksradio wat boeremusiek gespeel het oujaarsaand.
Ek onthou nog die mense by wie ons gaan kuier het sowel as die mense wat by ons kom kuier het. Die klein klappertjies, starlights en poppits. Partykeer as vriende uit die stad kom kuier het was daar allerhande soorte vreemde en eksotiese vuurwerke wat ons nie self sou gekoop het nie. Daar was kleurvolle vuurpyle en saluutklappers soos die Five Gun salute.
Nuwejaar was ook spesiaal met die feestelike atmosfeer steeds in die lug en ‘n ete wat baie herinner aan die Kersete van ‘n week tevore.
Soos wat kinders grootgeword het en sommige familie ons ontval het, het dinge verander. Mense het versprei en hulle eie lewens en tradisies begin bou. Verder het die land en die samelewing oor die algemeen verander.
Terwyl ons ‘n onsekere 2025 tegemoet gaan, sal hierdie brokkies uit die verlede mens altyd by bly. Mag al my lesers wat hier kom inloer te midde van alles wat hierdie jaar mag gebeur steeds ‘n geseende, voorspoedige en wonderlike 2025 geniet.