Vuurslag

Etiket: sosiale media

  • Tieners Sonder Sosiale Media

    Op 10 Desember 2025 het die Australiaanse regering begin om ‘n verbod toe te pas teen die gebruik van sosiale media vir kinders onder 16 jaar oud. Dit word gedoen om hulle te beskerm teen skadelike inhoud op sulke platforms soos onder kuber-afknouery, seksuele voorbereiding en uitbuiting ensovoorts. Verder is daar ook wêreldwyd kommer oor wat die gebruik van sosiale media aan kinders en jongmense doen en hoe dit hulle geestesgesondheid aantas. Veral op Instagram word daar dikwels van fotofilters gebruik gemaak sodat meisies en vrouens dan meer perfekte foto’s van hulself kan plaas. Dit veroorsaak dan vertwyfeling en ander liggaamlike onsekerhede by diegene wat nie so mooi kan lyk nie.

    Op Techcentral verskyn daar gister ‘n artikel waarin daar vergelykings getref word tussen hoe verskillende lande asook sosiale netwerk maatskappye hierdie netelige vraagstuk hanteer. In sommige lande mag kinders sosiale media gebruik met die uitsluitlike toestemming van hul ouers. Met die nuwe verbod in Australië word dit nie eers toegelaat nie. Geen ouers of voogde van kinders onder 16 mag toestemming gee vir kinders om sosiale media te gebruik nie.

    In ander gevalle word die gebruikersrekeninge van kinders beperk in terme van advertensie wat aan hulle opgedien mag word of met wie hulle op die netwerk kan kommunikeer. Daar is selfs verskillende weergawes van die netwerk beskikbaar vir kinders en volwassenes. Dink byvoorbeeld aan Youtube Kids vir kinders en die standaard weergawe van Youtube vir volwassenes.

    Veiligheid VS Menseregte

    Sommige menseregtegroepe het hierdie verbod gekritiseer en gesê dat dit kinders se reg tot vryheid van spraak en uitdrukking aantas. Die regering het egter volgehou dat hulle dit doen ter beskerming van kinders en die verbod deurgedruk ten spyte van erge teenkanting.

    Ander lande se beleid

    In Britanje het daar reeds in Julie 2025 nuwe wetgewing in werking getree wat webwerwe en sosiale netwerke verplig om ouderdomsverifikasie toe te pas om seker te maak dat kinders onder 18 teen gevaarlike materiaal te beskerm. Behalwe vir die inhoud wat normaalweg as skadelik beskou word, wil die “Online Safety Act” ook kwesbare jongmense beskerm teen inhoud wat eetversteurings aanwakker.

    In Amerika het verskeie deelstate al wetgewing ingestel wat verifikasie van ouderdom vereis. Dit het egter gemengde sukses gehad omdat invloedryke menseregtegroepe en selfs organisasies soos die Electronic Fronteer Foundation, toevallig ook afgekort as EFF, hul deelstaatsregerings hof toe gevat het om die toepassing van sulke wetgewing te verhinder. Hierdie artikel op Wikipedia gee meer besonderhede.

    Volgens hierdie video op Daily Bagel South Africa se kanaal is daar blykbaar ‘n groep van regskenners in Suid-Afrika wat ook aan konsepwetgewing soortgelyk aan Australië s’n werk om die jeug teen skadelike inhoud te beskerm. Hulle voel dat die algemene toelaatbare ouderdom van 13 jaar nie voldoende is om kinders te beskerm nie.

    Is hierdie regulasies werkbaar?

    Daar word gereeld daarop gewys dat tieners van “virtual private networks” oftewel vpns, kan gebruik maak om hierdie ouderdomsbeperkings te omseil. Die Britse regering hou egter hierdie situasie met ‘n houtoog dop en daar kan moontlik ‘n verbod teen hierdie vpns ook ingestel word. Die kommissaris vir kinders in Engeland, Dame Rachel De Souza, het reeds ‘n beroep op die regering gedoen om so ‘n verbod in te stel. As Britanje dit eers reggekry het, wat staan dan in ander lande soos Australië, Amerika en selfs Suid-Afrika se pad om dit te doen.

    Hoe voel jongmense en tieners hieroor?

    Op Maroela Media het daar gister ‘n artikel verskyn waarin jongmense van oor die wêreld gevra is oor hoe hulle voel oor hierdie verbod. Die reaksies was nogal uiteenlopend. Sommige van hulle het dit tentatief ondersteun, maar party het dit verwerp.

    Die groot vraag is of sulke wetgewing en regulasies regtig gaan help om kinders se verslawing aan sosiale netwerke te breek? Of gaan regerings heeltyd in ‘n stryd gewikkel wees teen ompaaie en skuiwergate wat kinders en tieners sal gebruik om wel toegang tot hulle gunsteling platforms te verkry.

    Gaan hierdie beperkings dalk ook maak dat jongmense meer sal uitgaan en meer tyd met hulle vriende spandeer? Of wat daarvan om meer tyd te spandeer om boeke te lees of handvaardighede aan te leer? Mens mag seker maar droom of hoe?

    Hier lê beslis baie interessante tye voor ons.

  • Baie geluk, Facebook

    Ek lees gister op
    http://praag.co.za dat Facebook aangekondig het dat hy nou sowat 500 miljoen gebruikers het. Dis voorwaar ‘n mylpaal vir hierdie sosiale netwerk. Sowat 1 uit 14 mense wereldwyd het nou ‘n Facebook profiel. Dit maak Facebook die grootste en kragtigste sosiale netwerk.

  • Miniblogging

    Die blogs vs twitter debat kom al ‘n paar jaar saam met
    ons. Daar is wel ook bloggers wat Twitter aanvullend tot hul
    blogs gebruik.
    Ek het nog altyd gewonder of daar nie dalk iets tussen-in
    is wat ‘n soort miniblogging platform bied vir openbare blogs
    nie. Daar is wel sosiale netwerke soos Jamble en
    blueworld wat sulke moontlikhede bied, maar jy moet lid
    van so ‘n netwerk wees om ‘n spesifieke persoon se blog
    te kan lees. My groot probleem met iets soos Twitter is dat
    jy slegs 140 karakters het om jouself in uit te druk. Ek is meer op soek na iets wat jou bietjie meer beweegruimte
    gee maar terselfdetyd so gebou is dat jy nie ‘n lang
    inskrywing op jou blog hoef te plaas nie. Jy sê net wat
    nodig is. Verder moet dit ook moontlik wees om jou miniblog
    maklik via jou selfoon by te hou net soos met Twitter.
    Weet iemand dalk van ‘n paar blink idees?

  • Facebook lite opgeskort

    Ek was ‘n gereelde gebruiker van Facebook se meer eenvoudige webwerf Facebook lite. Dis ‘n lekker vinnige webwerf en werk lekker saam met ouer weblesers soos Internet Explorer 6. Daarom was dit vir my ‘n skok toe ek verneem dat Facebook hierdie diens opgeskort het. In hulle amptelike reaksie sê hulle wel dat hulle baie uit hierdie oefening geleer het en hierdie kennis gaan gebruik om hulle standaard webwerf te verbeter. Intussen het ek nog ‘n probleem met Facebook. Ek kan nie die standaard blad op my rekenaar gebruik nie en moet nou maar Facebook mobile op my selfoon gebruik.
    Ek glo beslis dat diensverskaffers van sosiale media en kommunikasiedienste soos gratis e-posdienste saam met hulle standaard webwerwe ook 'n ligter weergawe van hulle webwerwe moet hê vir gebruikers wat ouer weblesers gebruik sowel as diegene wat sukkel met swak internetspoed. Baie dankie aan diegene wat dit reeds doen soos Google met 'n basiese html weergawe vir hulle gmail diens, Yahoo met 'n ygo weergawe van hulle blad en vuurslag.co.za/ met hulle vuurslag.co.za/ gadget waar jy inskrywings kan plaa, skakels op jou blogroll kan sit en jou statistieke van jou blog kan besigtig vir vandag en gister. Ander diensverskaffers kan beslis by julle kom leer.

  • Internet neem Afrikaans die toekoms in

    Tydens ‘n werkswinkel van die Afrikaner Burgerlike Netwerk het Jaco Kleinhans, kommunikasiebestuurder van Solidariteit gesê as Afrikaanse organisasies in die toekoms nog wil voortbestaan sal hulle nou al reeds daaraan moet dink daaraan om op sosiale netwerke soos Facebook, Twitter en Flickr te wees sowel as op die breër internet.
    Ongeveer 10% van Suid-Afrikaners het toegang tot die internet. Volgens navorsing deur Solidariteit het sowat 40% van blankes internet by die huis en nog meer het internettoegang by die werk.
    Kleinhans het gesê ons het nog glad nie die goedkoop hoëspoed internet in Suid-Afrika soos wat gebruikers in oorsese lande alreeds geniet nie, maar Afrikaanse organisasies moet nou alreeds begin regmaak vir die dag as ons wel sulke internet het. Afrikaners se huidige vlak van internetgebruik moet ook glad nie onderskat word nie. Afrikaans staan alreeds sterk op Facebook.
    Ek sou graag my eie stuiwer in die armbeurs wil gooi deur te sê dat dit nie net die organisasies nie, maar ook die gewone man op straat wat kan help om Afrikaans op die internet lewendig te hou. Ons as Afrikaanse webjoernaalskrywers moet nooit die belangrikheid van ons werk onderskat nie. Dieselfde geld vir diegene van ons wat Facebook, Twitter en ander media gebruik. Daarom, aan al my medebloggers, hou aan met die goeie werk wat julle doen en help sodoende om Afrikaans die toekoms in te neem.

  • Sosiale netwerke kan gedagvaar word oor skadelike inhoud

    Ek lees vanoggend ‘n artikel in die Beeld waar regskenners sê dat sosiale netwerke soos Facebook wel gedagvaar kan word oor skadelike inhoud wat op hulle webwerwe gepubliseer word. Dit volg na die storm wat veroorsaak is deur ‘n uiters haatlike inskrywing op ‘n aanhangersblad ter ere van Julius Malema, leier van die ANC se Jeugliga, op Facebook. Hierdie aanhangersblad is intussen gelukkig verwyder.
    Hierdie uitspraak van die regskenners laat my nogal wonder oor ‘n paar dinge. Dit is alombekend dat ‘n sosiale netwerk soos Facebook alreeds meer as 250 miljoen gebruikers het. Alhoewel Twitter nie hulle gebruikersgetalle graag bekend maak nie, sou dit nie vergesog wees om te beweer dat hulle ook tussen 100 en 200 gebruikers het. Hoe op aarde gaan hierdie netwerke in staat wees om beheer uit te oefen oor so baie gebruikers? Hoe gaan hulle sulke skadelike inhoud wat op hulle netwerke verskyn betyds kan onderskep voordat dit versprei en skade aanrig?
    Dit is ook alombekend dat meeste van hierdie netwerke gebruik word deur mense van reg oor die wêreld. Indien daar wel ‘n hofsaak teen die sosiale netwerk aanhangig gemaak word, in watter land moet jy dit doen? In jou eie land of in die land waar die sosiale netwerk sy hoofsetel het? As daar regskenners tussen my medebloggers is wat hiermee kan help sal dit verwelkom word.
    Nog ‘n vraag wat by my ontstaan is of maatskappye wat webjoernale huisves soos Google met hulle Blogger diens of Automatic wat WordPress besit ook onder dieselfde regsbeginsel gedagvaar kan word indien daar skadelike inhoud op hulle netwerke gepubliseer word? Albei hierdie diensverskaffers het wel stelsels in plek waar jy ‘n webjoernaal kan rapporteer wat die diensvoorwaardes van die diensverskaffer oortree.
    Indien dit wel sou gebeur dat sosiale netwerke en ander diensverskaffers van sosiale media wel in die toekoms strenger maatreëls instel om inhoud op hulle netwerke te reguleer sal dit ‘n hartseer dag wees en sal dit vryheid van spraak ernstig aantas. Dit sal dan ‘n klassieke geval wees van ‘n klein groepie oortreders wat die groter groep wetsgehoorsame burgers se pret bederf. Kom ons hoop maar daardie dag is nog ver in die toekoms.

  • Nasionale paniek op die internet

    Ek neem met kommer kennis van die jongste storm rondom die kop van Julius Malema, die leier van die ANC se Jeugliga. Iemand het ‘n rukkie terug ‘n uiters haatlike inskrywing op sy aanhangersblad op Facebook geplaas. Hierdie inskrywing beweer dat President Jacob Zuma om die lewe gebring gaan word en dat Malema dan die presidentskap van Suid-Afrika gaan oorneem. Blankes sal dan in hulle massas op die wreedste wyse vermoor word.
    Daar word nou beweer dat die persoon wat hierdie inskrywing geplaas het van ‘n vervalsde profiel gebruik gemaak het om dit te doen. Ons weet nog nie of ons hierdie dreigement ernstig moet opneem of nie, maar selfs al was hierdie haatskrywer nie ernstig nie het hierdie wandaad van hom die potensiaal om lelik hand-uit te ruk. Indien dit wel ‘n grap was moet hierdie persoon duidelik verstaan dit was ‘n uiters siek grap.
    Hierdie voorval bewys weereens die krag van die internet en meer spesifiek sosiale media. Hierdie haatboodskap het nou al baie ver oor die internet heen versprei en is selfs in ongeredigeerde formaat geplaas op die Afrikanervolksparty se webwerf waar ek dit die eerste keer te lese gekry het. Verder het dit erge woede en mismoedigheid veroorsaak op die Afrikaanse WordPress blogs en op die gewilde mobiele sosiale netwerk Jamble. Die verhouding tussen die verskillende bevolkingsgroepe in SA kan baie erg geskaad word wat op sy beurt onstabiliteit kan veroorsaak. Dis ‘n soort selfvervullende profesie.
    Ek hoop dat ‘n goeie internetspesialis hierdie haatskrywer wat soveel paniek landwyd veroorsaak het kan opspoor en hom goed aan die pen laat ry.

  • Die kerk en sosiale media

    Dis interessant om te sien hoedat die NG Kerk se Oostelike Sinode die nuwe sosiale media gebruik om hulle sinodesitting wat hierdie week plaasvind te bemark. Die gewone gemeentelid kan nou sien watter kwessies op die vergadering bespreek word. Die kerk kan ook meer direk met die publiek kommunikeer in plaas daarvan om deur die gevestigde mediakanale te werk wat heel dikwels die kerk se standpunte verkeerd vertolk of nie na behore daaraan aandag kan gee nie weens meer dringende nuusberigte van nasionale belang.
    Die sinode het ook ‘n blog op wordpress wat besigtig kan word by sinoos.wordpress.com asook ‘n twitter mikrojoernaal wat by www.twitter.com/sinoos besigtig kan word. Mens kan ook op Twitter van die hashtag #sinoos gebruik maak om ander deelnemers aan die sinode se kommentaar te lees of om self kommentaar te lewer.
    Die kwessies wat by gister se sinodesitting bespreek is is alles goed en wel, maar ons sal moet wag en sien hoe dit op die ou end praktiese inslag in die kerk se daaglikse bediening gaan vind. Kwessies soos die Christen en omgewingsbewaring, die Christen se getuienis in woord en daad aan diegene binne sowel as buite sy kerkgroep en die invloed van sonde op ons verhouding met God is bespreek. Ek is nogal nuuskierig om te sien wat die kerk op grondvlak gaan doen om hierdie vraagstukke aan te spreek. Gaan die kerk dalk meer betrokke raak by rommelherwinning? Gaan die kerk dalk lidmate aanmoedig om meer eenvoudiger te leef? Gaan die kerk mense aanmoedig om hulle verhouding met die Here te herstel nadat dit deur sonde verwoes is? Gaan die kerk lidmate toerus met die nodige hulpmiddele om meer effektief te getuig?
    Hopelik gaan hierdie sinodesitting wat meer as ooit in die openbare oog is meer wol as lawaai oplewer omdat hulle weet die gewone man op straat hou hulle dop.

  • Naspers in ‘n doodloopstraat

    Ek lees nou net Dan Roodt se artikel oor die swak gehalte van Rapport en ander koerante van Naspers. Ek stem nogal saam met die opinies wat daarin uitgespreek word. Gelukkig is ons geseënd met vandag se nuwe sosiale media wat ons as Afrikaners ten volle moet gebruik om ons eie standpunte te stel en die anti-Afrikanerpropaganda van hierdie linkse, slinkse media te omseil en aan die kaak te stel. Baie dankie aan hierdie Afrikaners wat reeds besig is om dit te doen.