Vuurslag

Etiket: tegnologie

  • Tieners Sonder Sosiale Media

    Op 10 Desember 2025 het die Australiaanse regering begin om ‘n verbod toe te pas teen die gebruik van sosiale media vir kinders onder 16 jaar oud. Dit word gedoen om hulle te beskerm teen skadelike inhoud op sulke platforms soos onder kuber-afknouery, seksuele voorbereiding en uitbuiting ensovoorts. Verder is daar ook wêreldwyd kommer oor wat die gebruik van sosiale media aan kinders en jongmense doen en hoe dit hulle geestesgesondheid aantas. Veral op Instagram word daar dikwels van fotofilters gebruik gemaak sodat meisies en vrouens dan meer perfekte foto’s van hulself kan plaas. Dit veroorsaak dan vertwyfeling en ander liggaamlike onsekerhede by diegene wat nie so mooi kan lyk nie.

    Op Techcentral verskyn daar gister ‘n artikel waarin daar vergelykings getref word tussen hoe verskillende lande asook sosiale netwerk maatskappye hierdie netelige vraagstuk hanteer. In sommige lande mag kinders sosiale media gebruik met die uitsluitlike toestemming van hul ouers. Met die nuwe verbod in Australië word dit nie eers toegelaat nie. Geen ouers of voogde van kinders onder 16 mag toestemming gee vir kinders om sosiale media te gebruik nie.

    In ander gevalle word die gebruikersrekeninge van kinders beperk in terme van advertensie wat aan hulle opgedien mag word of met wie hulle op die netwerk kan kommunikeer. Daar is selfs verskillende weergawes van die netwerk beskikbaar vir kinders en volwassenes. Dink byvoorbeeld aan Youtube Kids vir kinders en die standaard weergawe van Youtube vir volwassenes.

    Veiligheid VS Menseregte

    Sommige menseregtegroepe het hierdie verbod gekritiseer en gesê dat dit kinders se reg tot vryheid van spraak en uitdrukking aantas. Die regering het egter volgehou dat hulle dit doen ter beskerming van kinders en die verbod deurgedruk ten spyte van erge teenkanting.

    Ander lande se beleid

    In Britanje het daar reeds in Julie 2025 nuwe wetgewing in werking getree wat webwerwe en sosiale netwerke verplig om ouderdomsverifikasie toe te pas om seker te maak dat kinders onder 18 teen gevaarlike materiaal te beskerm. Behalwe vir die inhoud wat normaalweg as skadelik beskou word, wil die “Online Safety Act” ook kwesbare jongmense beskerm teen inhoud wat eetversteurings aanwakker.

    In Amerika het verskeie deelstate al wetgewing ingestel wat verifikasie van ouderdom vereis. Dit het egter gemengde sukses gehad omdat invloedryke menseregtegroepe en selfs organisasies soos die Electronic Fronteer Foundation, toevallig ook afgekort as EFF, hul deelstaatsregerings hof toe gevat het om die toepassing van sulke wetgewing te verhinder. Hierdie artikel op Wikipedia gee meer besonderhede.

    Volgens hierdie video op Daily Bagel South Africa se kanaal is daar blykbaar ‘n groep van regskenners in Suid-Afrika wat ook aan konsepwetgewing soortgelyk aan Australië s’n werk om die jeug teen skadelike inhoud te beskerm. Hulle voel dat die algemene toelaatbare ouderdom van 13 jaar nie voldoende is om kinders te beskerm nie.

    Is hierdie regulasies werkbaar?

    Daar word gereeld daarop gewys dat tieners van “virtual private networks” oftewel vpns, kan gebruik maak om hierdie ouderdomsbeperkings te omseil. Die Britse regering hou egter hierdie situasie met ‘n houtoog dop en daar kan moontlik ‘n verbod teen hierdie vpns ook ingestel word. Die kommissaris vir kinders in Engeland, Dame Rachel De Souza, het reeds ‘n beroep op die regering gedoen om so ‘n verbod in te stel. As Britanje dit eers reggekry het, wat staan dan in ander lande soos Australië, Amerika en selfs Suid-Afrika se pad om dit te doen.

    Hoe voel jongmense en tieners hieroor?

    Op Maroela Media het daar gister ‘n artikel verskyn waarin jongmense van oor die wêreld gevra is oor hoe hulle voel oor hierdie verbod. Die reaksies was nogal uiteenlopend. Sommige van hulle het dit tentatief ondersteun, maar party het dit verwerp.

    Die groot vraag is of sulke wetgewing en regulasies regtig gaan help om kinders se verslawing aan sosiale netwerke te breek? Of gaan regerings heeltyd in ‘n stryd gewikkel wees teen ompaaie en skuiwergate wat kinders en tieners sal gebruik om wel toegang tot hulle gunsteling platforms te verkry.

    Gaan hierdie beperkings dalk ook maak dat jongmense meer sal uitgaan en meer tyd met hulle vriende spandeer? Of wat daarvan om meer tyd te spandeer om boeke te lees of handvaardighede aan te leer? Mens mag seker maar droom of hoe?

    Hier lê beslis baie interessante tye voor ons.

  • KI Maak Die Nuus Verspot

    Google Discover se jongste KI eksperiment is besig om ‘n groot bespotting van ernstige nuus te maak.

    The Verge het vandag ‘n baie interessante artikel gepubliseer oor Google wat nou ‘n interessante eksperiment op hulle Google Discover nuusdiens begin het waarmee hulle self nuusflitse deur middel van kunsmatige inteligensie genereer vir nuusstories wat hulle op ander nuusblaaie kry. Dit in plaas daarvan om die opskrifte te gebruik wat deur die nuuswerwe self verskaf word. Google dink seker hulle kan dan die nuusflitse meer interessant maak sodat meer lesers daarop sal kliek.

    Die groot probleem hiermee is dat die bot wat die nuwe nuusflitse genereer, dikwels die opskrifte baie sensasioneel laat klink. As die niksvermoedende leser op die opskrif kliek, wys die oorspronklike opskrif van die nuuswerf wat heel dikwels meer gematig of rasioneel is en meer toepaslik vir die storie is wat gedek word.

    Die joernalis wat hierdie artikel geskryf het, Sean Hollister, het ook verskeie voorbeelde genoem van hoe Google Discover se nuwe KI kletsbot ernstige nuusberigte se opskrifte goed opgekoffie het.

    Verspotte Nuusflitse

    Did you know that BG3 players exploit children? Are you aware that Qi2 slows older Pixels?

    Dis maar net enkele voorbeelde van hoe nuusflitse meer sensasioneel gemaak word sodat meer mense daarop moet kliek om dit te lees. Daar is egter ‘n naam vir sulke uitlokkende opskrifte op artikels. Clickbait. Daar is so ver my kennis strek nog nie ‘n goeie afrikaanse woord daarvoor nie.

    Al hierdie nuutgeskepte KI nuusflitse is nie altyd so oordrewe en sensasioneel nie, maar partykeer word opskrifte deur die bot afgestomp sodat dit nie so interessant is soos wat die oorspronklike nuusblad se opskrif is nie.

    Hier is ‘n paar voorbeelde wat deur die skrywer genoem word.

    • “Origami model wins prize”

    • “Hyundai, Kia gain share”

    Maar hier is die oorspronklike opskrifte.

    In ‘n poging deur die bot om opskrifte vir nuusberigte af te kort, word dit partykeer so geskryf dat dit misleidend oorkom. “Steam Machine price revealed,”

    Die nuwe speletjiesmasjien se prys is nog nie bekend gemaak nie. Dit gebeur eers volgende jaar. Maar hier is die oorspronklike opskrif.

    valve,s steam machine looks like a console, but don’t expect it to be priced like one

    “Microsoft developers using AI”?

    Maar hier is die oorspronklike opskrif.

    How microsoft’s developers are using AI

    Nog voorbeelde van sulke uitlokkende veranderde opskrifte word in die oorspronklike artikel op The Verge genoem.

    Ek weet nie of hierdie eksperiment hier in Suid-Afrika ook gedoen word nie, maar ek sal nie verbaas wees as sulke lawwe opskrifte wel op my Google Discover nuusvoerder opduik nie.

    Daar bestaan met reg groot kommer oor hierdie tipe eksperimente. Daar word nie op die nuusvoerder van Google Discover aangedui dat die opskrif verander is nie. Gewone lesers kan onder die vals indruk geplaas word dat die oorspronklike nuuswebwerf self hierdie lawwe opskrifte aan Google voorgelê het. Dit kan dan ‘n vraagteken plaas op die profesionaliteit van joernaliste, redakteurs, nuusskrywers en taalversorgers by hierdie nuusdienste.

    Hierdie is wel nog net ‘n eksperiment en daar word gehoop dat mense hulself sterk hierteen sal uitspreek sodat Google nie hierdie absolute verslopping ‘n permanente kenmerk van hulle nuusdiens maak nie.

    die teenstrategie

    Wat kan gedoen word om hierdie gruwelike eksperiment te vermy?

    Die beste is om boekmerke vir jou gunsteling nuusdienste op jou foon of rekenaar se webblaaiers te laai. Gaan eerder direk na hul webwerwe toe eerder as om jou nuus deur Google Discover te kry. Indien jy baie nuusdienste het waarmee jy tred moet hou, kan daar van ‘n RSS leser gebruik gemaak word. Daar is verskeie goeie RSS lesers beskikbaar vir alle groot bedryfstelsels soos Windows, Android en IOS. Meeste webwerwe het ‘n RSS nuusvoerder waarby jy kan inteken met jou leser. Dan hoef jy nie noodwendig so baie boekmerke te laai nie, maar direk op jou elektroniese nuusleser lees wanneer daar nuwe artikels op jou nuusdienste verskyn.

    Verder kan hierdie strategie ook help dat hierdie nuusdienste die nodige advertensie-inkomste kry wat hulle verloor het na Google se besluit om al meer van hulle eie kunsmatige inteligensie gebruik te maak vir hulle soektogte. In plaas daarvan dat hulle mense wat na inligting soek, lei na webwerwe wat die nodige antwoorde het, gee hulle self die andwoorde en hou die leser dan op hulle eie webwerf vas. As die leser dan die antwoorde het, kliek hulle nie verder op webwerwe wat oorspronklik die antwoord gegee het nie.

    Staan vas, mense. Moenie van julle proefkonyne laat maak nie.

  • Al Ons Digitale Eiers In Enkele Mandjies

    Het ons nie die laaste paar jaar te afhanklik geword van groot internetgebaseerde dienste wat ons hele werkslewe en vermaaklikheid oorgeneem het?

    Ons het ons digitale eiers in enkele mandjies gepak en as een van daardie mandjies skielik geskud word of amper val, dan ontwrig dit ons daaglikse werkverrigting en ontspanning.

    Hierdie vraag word al meer gevra nadat drie onderbrekings by groot internet infrastruktuurdienste binne die bestek van een maand groot internasionale ontwrigting veroorsaak het. Amazon Web Services, Microsoft en Cloudflare is hierdeur geraak.

    Amazon Web Services

    Op 20 Oktober 2025 was daar ‘n groot onderbreking by Amazon Web Services se Amerikaanse bedieners nadat ‘n fout ingesluip het by die programatuur wat die DNS, oftewel “domain Name Servers” op AWS se bedieners reguleer. Dit het wêreldwye ontwrigting veroorsaak op sosiale media soos Snapchat, elektroniese bankdienste en selfs dienste wat gekonnekteerde huise aan die gang hou. In sommige gevalle was daar mense wat beddens het wat aan die internet gekoppel is. Jy kan dan van jou slimfoon of tablet af jou bed se temperatuur beheer. Ongelukkig gebeur dit toe dat hierdie beddens te warm geword het toe AWS se bedieners nie meer die beddens kon reguleer nie, met temperature van tot veertig grade Celsius wat aangemeld is.

    Vele webwerwe, produktiwiteitstoepassings en besigheidstoepassings is ook negatief geraak en administratiewe werkers kon nie hul werk gedoen kry nie.

    Hierdie onderbreking het sowat vyftien uur lank aangehou, maar sommige mense is nog langer sonder internetdienste gelaat omdat ‘n agterstand van dataverwerking eers ingehaal moes word voordat alles weer optimaal kon funksioneer.

    Ek was nog altyd skepties oor die toekomsdrome van stowe, yskaste, televisies en kan jy glo selfs toilette wat aan die internet gekoppel is. In die eerste plek is jou gebruikersdata op sentrale bedieners en wie weet wie almal toegang kan verkry tot hoogs vertroulike data. Ek het altyd die voorbeeld gebruik van ‘n man wat aansoek doen vir mediese versekering en dan met ‘n hoë maandelikse premie aangeslaan word. By navraag hoekom dit dan so is, word hy ingelig dat hy baie bier drink. Toe hy die versekeraar vra waar hulle dan aan sulke snert kom, word die data van sy gekoppelde yskas getrek en dit wys hoeveel botteltjies bier hy ingesit en uitgehaal het.

    Dink nou net wat gebeur as die webbedieners wat jou slim ketel, yskas, motorhuisdeure, slim deurklokkies en elektroniese slotte beheer, skielik gaan staan? Dit sal mos chaos wees.

    Microsoft

    Op 29 Oktober 2025 was daar weer so ‘n onderbreking. Hierdie keer by Microsoft se Amerikaanse webbedieners. Dit nadat ‘n fout ontstaan het by programatuur wat die verkeer op die webbedieners reguleer. Dienste soos Microsoft 365, Outlook, Teams en Azure is tot stilstand geruk.

    Microsoft se programingenieurs moes die programweergawe op die bedieners tot ‘n vorige weergawe terug verander om dit weer aan die werk te kry.

    Mense het gesukkel met e-posse wat vasgesit het, dokumente wat nie verwerk kon word nie en boodskappe en video-oproepe wat nie kon deurgaan nie.

    Die onderbreking het enkele ure geduur.

    Cloudflare

    Op 18 November 2025 was daar nog ‘n grootskaalse onderbreking. Hierdie keer by Cloudflare.

    Cloudflare help om webwerwe te beskerm teen wydverspreide misgunningsaanvalle waartydens webwerwe en dienste lamgelê kan word as gevolg van doelbewuste oorlading op die webbedieners. Verder help dit ook om verkeer te reguleer op webwerwe wat baie gebruikers het deur dit meer eweredig te versprei.

    Gister was daar egter ‘n onderbreking op Cloudflare se bedieners as gevolg van ‘n “configuration file” wat heeltemal te groot was, aldus Cloudflare se amptelike verduideliking.

    Verskeie Suid-Afrikaanse nuuswebwerwe soos Mybroadband Techcentral Businesstech en Die Vryburger was ook uitgeknikker deur die onderbreking. die sosiale netwerk X het ook daaronder gely en die grafiese ontwerpersdiens Canva was ook buite werking.

    Gelukkig kon Cloudflare se programeerders die fout gou herstel en die onderbreking het net enkele ure geduur. Webwerwe en dienste was gistermiddag sporadies aan en af soos ‘n flikkerlig.

    Desentralisasie

    Daar sal ernstig oorweeg moet word om van ‘n wyer verskeidenheid van webbedieners en maatskappye gebruik te maak vir dienste wat wel gesentraliseerde internet infrastruktuur benodig soos webwerwe, kommunikasietoepassings en samewerkingsprogramatuur vir besighede. Hier is ‘n gulde geleentheid vir jong beginners wat tot die inligtings- en kommunikasiesektor wil toetree.

    Verder bepleit ek ook die lokalisering van kantoorprogramme soos woordverwerkers, sigblaaie, databasisse en selfs rekenkundige programme waar moontlik. Ek besef wel dat boekhouding soms sentralisering benodig, veral in groter maatskappye of waar ‘n groep verwante maatskappye se data in een administratiewe middelpunt verwerk moet word. Maar wat die woordverwerkers, sigblaaie en databasisse betref kan daar gerus oorweeg word om na ‘n ouer meer betroubare besigheidsmodel terug te keer waar elke werknemer sy eie kantoorprogramme op sy eie rekenaar het en met werk kan aangaan sonder om afhanklik te wees van ‘n bediener wat jou kantoorwerk beheer.

    Wat sal gebeur as kwaadwillige kuberterroriste dit kan regkry om verskeie van hierdie internetdienste soos administrasiedienste, betalingsverwerkers, kommunikasietoepassings en gashere vir nuusmedia se webwerwe gelyktydig tot stilstand kan dwing? Dit sal totale ekonomiese chaos wees. As hulle dit kan regkry om kragnetwerke ook buite aksie te stel kan dit tot enome sosiale onrus lei.

    Juis daarom is dit belangrik vir ons op mikrovlak en vir organisasies, staadsdepartemente en sakeondernemings op makrovlak om hierdie kwessies ernstig te oorweeg sodat ons in die toekoms nie so kwesbaar gelaat kan word as daar wel ernstige onderbrekings by groot internetdienste voorkom.

     

  • Het die onafhanklike internet nog ‘n toekoms?

    Hierdie vraag word die laaste sowat twee jaar al meer gevra nadat Google sy algoritmes begin verander het en sodoende ‘n klomp kleiner onafhanklike webblaaie heeltemal uit hul soekresultate uitgeskakel het en nie enige nuwe artikels op hulle soekindeks gelys het nie of andersins dit baie laag op hulle soekresultate geplaas het, soms tot op die tweede en derde bladsy. Die adverteerders en ander gevestigde belange het voorrang geniet op die eerste bladsy.
    Hierdie video op Clownfish TV het my genoop om ook hieroor te skryf aangesien daar bitter min materiaal in Afrikaans is oor hierdie onderwerp.
    https://www.youtube.com/watch?v=RnhUGLxawTQ&t=28s
    Die aanbieder, wat as Neon bekendstaan, het ‘n artikel aangehaal wat onlangs op Google se blog, The Keyword, verskyn het.
    https://blog.google/products/search/ai-mode-search/
    Diegene van U wat nou onlangs soektogte op Google gedoen het, sou opgemerk het dat daar sogenaamde “ai overviews” bo-aan jou resultaatbladsy verskyn het. Die idee is dat jy ‘n antwoord op jou vraag sou kry en dit dan nie nodig sou vind om verder deur ‘n klomp resultate te blaai om jou antwoorde daar te kry nie.
    Die groot probleem vir eienaars van webwerwe is dat dit dan verkeer weglei van hulle eie webblaaie af en dat die websoeker dan langer op Google se eie webblad sal bly en sodoende met meer advertensies van Google Self oorweldig kan word.
    In hul jongste aankondiging maak Google dit bekend dat hulle hierdie oorsigte wat deur kunsmatige inteligensie aangedryf sal word gaan uitbrei sodat jy as die websoeker dit nog minder nodig gaan vind om op ander resultate te kliek. Hierdie nuwe verbeterde KI oorsig word deur google se eie Gemini assistent aangedryf.
    Indien Gemini ‘n antwoord kan genereer uit jou soektog, sal jy meestal met inligting bedien word wat deur Gemini saamgestel is. Jy kon dus net so wel eerder na Gemini se eie webblad toe gegaan het en daar gaan soek het in plaas van Google. Indien Gemini nie ‘n antwoord kan genereer uit jou soektog nie, sal jy met ‘n lys van resultate bedien word soos wat voorheen gebeur het.
    Indien jy al die jare daarop staatgemaak het dat jy deur middel van gewone organiese soekresultate jou webwerf kon laat groei het sonder om advertensies by Google of enige ander groot internetplatform uit te neem, dan gaan jy in die toekoms baie sukkel. Kleiner handelswebwerwe, webjoernale ensovoorts word deur die nuwe soekalgoritmes van Google heeltemal eenkant toe geskuif en verdwyn eenvoudig in die donker geheuegat af.
    Webwerwe soos www.retrododo.com wat handel oor videospeletjies uit die verlede, asook www.housefresh.com wat resensies doen oor lugsuiweraars, ontvogters ensovoorts het na Google se veranderings van 2023 onderskydelik 85% en 91% van hulle webverkeer verloor. Dit het ‘n groot verlies aan advertensie-inkomste veroorsaak. Hierdie webwerwe het heelwat publisiteit geniet in die hoofstroom tegnologie-media nadat hulle self artikels daaroor geskryf het. Sommige kommentators was simpatiek teenoor hierdie webwerwe en hulle personeel en het gevoel dat die maatskappye slagoffers was van Google se rondfoetery met hulle soekprogramatuur. Andere het weer gevoel dat hierdie besighede te afhanklik van Google se platform was en nie ‘n behoorlike basis van besoekers en kliënte gevestig het wat gereeld terugkeer na hulle webwerf toe nie.
    Behalwe vir KI wat besoekers weglei van onafhanklike webwerwe af, is daar ook die probleem dat Google deesdae nie eers meer moeite doen om nuwe inskrywings van blogs te indekseer nie. Ek bedryf hierdie webjoernaal al van 2009 af en heelwat van my ouer materiaal is wel op Google gelys, maar nuwe inskrywings word glad nie gelys nie. Dan praat ons nie eers van nuwe webwerwe en blogs wat nou in die onlangse verlede eers oopgemaak is nie. Hierdie nuwe spelers gaan dit moeiliker hê om op soekenjins gelys te word. Selfs die kleiner soekenjins soos Duckduckgo, Bing en Yahoo loer ook maar so skelm na Google se rangordes en boots hulle dan na.
    Wat doen ons nou? Vir diegene van ons vir wie blogging ‘n stokperdjie is, is dit seker nie so ‘n groot probleem nie, maar wat as jy ‘n besigheid wil vestig met jou skryfvaardighede of jy wil andere se besigheid bemark deur middel van jou webjoernaal? Wat kan jy doen om jou webblad meer blootstelling te gee.
    Jy kan jou webskakels op sosiale netwerke deel. Ek deel my webskakels gereeld op Twitter en Mastodon waar daar groot verkeer is en waar jou inskrywing deur baie mense raakgesien kan word wat jou sosiale kanale volg of diegene wie selfs net ‘n sekere hitsmerk volg wat jy in jou inskrywing gebruik. Jy kan selfs ook Facebook gebruik, maar daar is ongelukkig ook algoritmes wat jou soms onsigbaar maak.
    Verder word daar ook aanbeveel dat jy ‘n nuusbrieffasiliteit op jou webwerf moet hê wat jou lesers sal toelaat om op jou webblad in te teken en jou artikels dan as nuusbriewe per e-pos te ontvang. Vir besighede kan dit ook tot beter verkope lei.
    Verder kan veral bloggers ook promosies vir ander bloggers doen. Indien jy op iemand anders se webjoernaal afkom waarvan jy baie hou, kan jy ‘n promosionele artikel op jou eie webjoernaal skryf en die beste van die ander blogger se artikels in jou artikel uitlug. Ek het onlangs twee sulke promosies vir Die Berig sowel as vir Karmen Niehaus gedoen, alles gratis. Dis vir die groter saak van Afrikaanse blogs waaroor ek passievol is.
    Intussen wens ek alle webbladeienaars en bloggers sterkte toe met hierdie uiters uitdagende tyd. Mag daar ‘n tyd kom dat webinhoud wat deur gewone mense geproduseer word, weer voorrang sal geniet.

  • Die Goue Middeweg tussen tegnologie en menslikheid

    Oë wat toe is van die bokvet
    Wat gebeur as jy skielik van tegnologie afhanklik is om jou lewensnoodsaaklike pensioen te trek maar jy is as bejaarde persoon glad nie rekenaargeletterd nie? Gaan die staatsamptenaar agter die toonbank ons mense wat die land help opbou et net so aan ander se genade oorlaat of gaan hulle sulke mense kan help? Hier is nog een van oom Jasper se wyshede.

  • Vaarwel Youtube Go

    Die afgelope paar jaar gebruik ek al Android Go, die ligter weergawe van Android vir selfone met minder stoorruimte asook minder werkende geheue, beter bekend as random access memory. Hierdie bedryfstelsel bevat ligter weergawes van Google se stelseltoepassings soos Assistant Go, Gmail Go, Maps Go en Youtube go.

    Gisteraand laat het Google ‘n e-pos uitgestuur aan gebruikers van sy Youtube Go toepassing om ons in te lig dat Youtube Go vanaf Augustus 2022 nie meer beskikbaar sal wees nie. Mense word nou aangeraai om Youtube se hooftoepassing vir Android slimfone te gebruik of om Youtube met ‘n webblaaier soos Chrome of Firefox te stroom.

    Ek was nog altyd ‘n groot aanhanger van Youtube go se goeie beheerpaneel waarmee mens die toepassing se dataverbruik en videokwaliteit kon beheer. Dit het my datakostes redelik laag gehou en ek kon ook videos kyk op Wifi netwerke wat relatief stadig was. Die gewone weergawe van Youtube het ook instellings waarmee jy jou videokwaliteit en dataverbruik kan reguleer maar daar moet nog gesien word hoe dit met Youtube Go se uitstekende databeheer vergelyk.

    Youtube go was ook heelwat ligter op die batterykrag as die gewone toepassing en het ook nie jou foon maklik laat warm word soos wat soms gebeur het met ouer fone as jy Youtube vanaf jou webblaaier stroom. Ek moet nog verdere toetse doen om te sien hoe goed die gewone toepassing sal vaar as mens sy kragverbruik en alles wat daarmee saam gaan vergelyk.

    Verder was Youtube Go ook meer toeganklik vir gebruikers van Google se Talkback Skermleser. Mens kon maklik toegang kry tot die mediabeheer terwyl ‘n video besig was om te speel. Op die gewone Youtube toepassing is die mediabeheer nie so heeltemal toeganklik vir skermlesers nie. Mens sukkel om ‘n video te stop as dit eers begin speel het. Die res van die toepassing is egter meer toeganklik en mens kan maklik kies tussen die verskillende panele soos jou tuisblad, jou ingetekende kanale of jou biblioteek. Daar is ook ‘n klomp onderafdelings op jou tuisblad waar jy videos oor verskeie onderwerpe kan kyk. Dit word gewoonlik geselekteer volgens jou kykpatrone. Daar is selfs ‘n afdeling vir kort videos, heel waarskynlik om Tiktok bietjie kompetisie te gee.

    Mens kan maar net wonder hoe die tegnologiese pers en meningsvormers hierop sal reageer. Hier is solank ‘n artikel vanaf Android Authority.

    https://www.androidauthority.com/youtube-go-dead-3160656/#:~:text=Unfortunately%2C%20Google%20has%20announced%20on,%2C%20and%20low%2Dend%20devices

    Intussen sal ek maar die beste maak van my oorblywende tydjie saam met kleinboet.

  • Hoe toeganklik is wordpress app vir android?

    Ek is tans besig om bietjie met wordppress vir android te speel en toets bietjie om te kyk hoe toeganklik dit is saam met Talkback skermleser vir android. Dit lyk darem of mens die mees basiese funksies van blogging te doen. Een belangrike ding vir gesiggestremdes wat ook van hierdie toepassing wil gebruik maak is om eerder van die html editor gebruik te maak eerder as die visual editor. Dis meer toeganklik.
    Intussen kan ek net my dank uitspreek aan alle programontwikkelaars wat dit moontlik maak vir gesiggestremdes om ook hoofstroom tegnologie soos Android en Ios te gebruik. Veral Android het drasties vooruitgang gemaak met betrekking tot toeganklikheid en die slimfone en tablette word by die dag meer bekostigbaar. Doen so voort.

  • Nuwe Blackberry skermleser

    Ek het dit so pos reggekry om WordPress vir Blackberry op my Blackberry slimfoon te aktiveer deur middel van die nuwe Blackberry skermleser toepassing wat in Mei 2012 deur Research In Motion bekendgestel is. So ver is die nuwe skermleser met gemengde welslae deur die gesiggestremde gemeenskap ontvang. Een van die grootste probleme met die skermleser is dat dit dikwels die foon laat vries. Dan moet mens maar weer die foontjie van voor af aan die gang kry deur middel van ‘n soft reset of deur due battery te verwyder en dit weer terug te plaas. Maar as die skermleser we’ll werk dan werk dit baie goed en is ek oor die algemeen tevrede met sy werkberrigting. Anders as sommige ander skermlesers praat die nuwe Blackberry Screenreader met so ‘n stekato vrouestem wat ‘n tydjie vat om aan gewoond te raak. Gelukkig gee dit jou toegang tot meeste ban jou belangrike toepassimgs soos die telefoon, kontakte, e-pos, sosiale netwerke en sommige webblaaie kan ook deur middel van die webblaaier op jou Blackberry gelees word. Verder werk die skermleser ook goed saam met sommige kitsboodskaptoepassings soos Whatsapp en kan potensieel ook met Mxit werk. Ek glo hierdie nuwe Blackberry was beslis ‘n goeie belegging.

  • Die verwarring van oudio captchas

    Ek het al by verskeie geleenthede probeer om rekening by internetdienste en sosiale netwerke te open. As deel van jou aansoekvorm kry jy dan ook ‘n sogenaamde captcha wat jy moet invul. ‘n Captcha is ‘n grafiese verifikasiekode wat mens moet invul omte bewys dat jy wel ‘n menslike aansoeker is en nie ‘n outomatiese rekenaarprogram wat gemorspos oor die netwerk gaan versprei nie. Vir diegene van ons wat nie die prentjiekode kan sien nie, word daar heel dikwels ‘n oudio-weergawe van die captcha beskikbaar gestel.

    die probleem met sommige van hierdie captchas is dat jy ‘n verskeidenheid van woorde gegee word om te luister terwyl jy slegs twee of meer daarvan moet invul. Dit behoef geen genie om te besef dat so ‘n stelsel uiters verwarrend is nie.

    Waarom verskaf hierdie diensverskaffers nie eerder slegs die kodewoorde wat mens moet invul nie en los al die ander tierlantyntjies uit. Dit sal beslis die lewe makliker maak vir die betrokke internetmaatskappye en sosiale netwerke sowel as nuwe aansoekers wat graag van hul dienste wil gebruik maak maar nie oor al die tegniese vaardighede beskik nie. Verder sal dit ons as gesiggestremdes ook help om volle beheer te hê oor ons internetrekeninge en wagwoorde en nie afhanklik te wees van andere wat ons met sulke aansoeke moet help en dalk op onbehoorlike wyse toegang tot ons internetrekeninge kan kry nie.

  • Windows 8 Is Op Pad

    Die rekenaarprogrammatuurreus Microsoft het op Skrikkeldag, 29 Februrarie 2012, vir groot opgewondenheid gesorg nadat hulle ‘n toetsweergawe van Windows 8 by die Mobile World Congress in Barcelona, Spanje, bekendgestel het.
    So ver is hierdie toetsweergawe, ook bekend as die “beta” weergawe van die Windows 8 bedryfstelsel al deur mense in meer as 70 lande afgelaai om getoets te word.
    Hierdie bedryfstelsel kan op gewone rekenaars, skootrekenaars en tabletrekenaars werk. Dit is dus nie meer nodig vir Microsoft om verskillende bedryfstelsels vir gewone rekenaars en tabletrekenaars te skryf nie.

    Microsoft beweer dat Windows 8 op ‘n gewone rekenaar slegs 8 sekondes neem om ten volle te laai as die rekenaar aangeskakel word. Indien dit wel so realiseer sal dit absoluut alle rekords breek vir die bedryfstelsel met die vinnigste aanskakelspoed. Die meeste bedryfstelsels wat tans beskikbaar is neem romdom 30 sekondes om aan te skakel en te laai.

    Windows 8 doen weg met die gewone Windows kieslys en maak gebruik van ‘n ontwerp waar programme amper soos ‘n mosaiek van teëls op die rekenaarskerm vertoon word. Diegene van julle wat al mosaiek kunswerk gesien het sal weet waarvan ek praat. Die teëls op die skerm lyk amper soos padtekens. Programme kan oopgemaak word deur met jou vinger op die skerm te raak waar die toepaslike programme se teëls vertoon word mits jy ‘n rekenaar met ‘n raakskerm het. Jy kan egter ook met jou muis kliek om programme oop te maak as jy nie ‘n raakskerm wil gebruik nie.

    Hierdie nuwe soort ontwerp kan dalk ernstige uitdagings stel vir maatskappye en organisasies wat skermlesers vir gesiggestremde en leesgestremde rekenaargebruikers skryf. Hierdie groepe is veral afhanklik van kieslyste wat met ‘n toetsbord genavigeer word. Microsoft sal daaraan moet dink om regtig saam te werk met hierdie organisasies om alternatiewe te vind wat dit vir hierdie organisasies en maatskappye moontlik sal maak om die nuutste skermlesers te kan skryf wat met gemak deur hierdie kwesbare groeperings gebruik kan word. Heelparty mense se werksekerheid hang daarvan af. dit het al in die verlede gebeur dat veral gesiggestremdes hul werk verloor het omdat hulle spraakprogramme nie versoenbaar was met die maatskappy se bedryfstelsel nie.

    Ek is nogal nuuskierig om te lees wat die gewone mense wat bevoorreg is om hierdie bedryfstelsel te kan toets daarvan dink. Ek sal beslis die webjoernale dophou vir enige verdere nuus.