Vuurslag

Kategorie: Algemeen

  • Nasionale paniek op die internet

    Ek neem met kommer kennis van die jongste storm rondom die kop van Julius Malema, die leier van die ANC se Jeugliga. Iemand het ‘n rukkie terug ‘n uiters haatlike inskrywing op sy aanhangersblad op Facebook geplaas. Hierdie inskrywing beweer dat President Jacob Zuma om die lewe gebring gaan word en dat Malema dan die presidentskap van Suid-Afrika gaan oorneem. Blankes sal dan in hulle massas op die wreedste wyse vermoor word.
    Daar word nou beweer dat die persoon wat hierdie inskrywing geplaas het van ‘n vervalsde profiel gebruik gemaak het om dit te doen. Ons weet nog nie of ons hierdie dreigement ernstig moet opneem of nie, maar selfs al was hierdie haatskrywer nie ernstig nie het hierdie wandaad van hom die potensiaal om lelik hand-uit te ruk. Indien dit wel ‘n grap was moet hierdie persoon duidelik verstaan dit was ‘n uiters siek grap.
    Hierdie voorval bewys weereens die krag van die internet en meer spesifiek sosiale media. Hierdie haatboodskap het nou al baie ver oor die internet heen versprei en is selfs in ongeredigeerde formaat geplaas op die Afrikanervolksparty se webwerf waar ek dit die eerste keer te lese gekry het. Verder het dit erge woede en mismoedigheid veroorsaak op die Afrikaanse WordPress blogs en op die gewilde mobiele sosiale netwerk Jamble. Die verhouding tussen die verskillende bevolkingsgroepe in SA kan baie erg geskaad word wat op sy beurt onstabiliteit kan veroorsaak. Dis ‘n soort selfvervullende profesie.
    Ek hoop dat ‘n goeie internetspesialis hierdie haatskrywer wat soveel paniek landwyd veroorsaak het kan opspoor en hom goed aan die pen laat ry.

  • ‘n Duur April. En dis geen grap

    So ‘n rukkie terug het ons die skoknuus verneem dat Evkom sy kragtariewe wel met 25% per jaar gaan verhoog. Hierdie verhoging tree Aprilmaand in werking. Vanoggend op die nuus hoor ek toe dat die brandstofprys volgende maand na raming met 50c per liter gaan styg. Die finale prysverhoging is nog nie aangekondig nie. Ten minste die helfte van hierdie verhoging, 25c, word veroorsaak deur die verhoging in die brandstofheffing wat tydens die begroting in Februarie aangekondig is.
    Ons gewone verbruikers, salaristrekkers en ander platsakke sal op 1 April nie veel hê om oor te lag nie. Sterkte vir julle almal.

  • Dis soms so onregverdig

    Hier is sommer net ‘n paar filosofiese vrae wat my al laat wonder het.
    Hoekom is dit so dat goeie vrouens soms slegte mans trou wat hulle nie waardeer nie en erge trauma in hulle lewens veroorsaak as gevolg van gesinsgeweld of emosionele mishandeling? Dit gebeur natuurlik ook dat goeie mans met slegte vroue trou wat ook hulle siele erg vergal. Indien sulke persone daarin slaag om uit sulke ongesonde verhoudings te kom kruip hulle so in hulle dop dat dit amper onmoontlik is vir iemand wat wel sou omgee om hulle te bereik.
    Tweedens wonder ek hoekom dit soms gebeur dat ouers wat nie goed na hulle kinders kan omsien nie en hulle blootstel aan mishandeling of verwaarlosing so baie kinders kan hê terwyl diegene wat lief is vir kinders soms kinderloos bly?
    Hierdie is sommer net ‘n paar dinge wat my soms laat stilstaan en wonder.

  • Die Afrikaanse blogs groei vinnig

    Ek kyk gereeld op die Afrikaanse afdeling van WordPress, te besigtig by af.wordpress.com na die volledige lys van top blogs van die dag. Dis vir my ‘n riem om die hart om te sien hoeveel nuwe bloggers en interessante nuwe blogs daar so einde Desember tot vroeg in Januarie bygekom het. Hier verwys ek veral na blogs soos Sommer alles blog, Jlmriekert, Stoop se Stoep, Middernag, Karlien Du Preez, Geeskomitee ensovoorts. Sommige bloggers het ook van hulle eie vriende en aanhangers so ver gekry om by hulle blog te kom inloer en kommentaar te lewer. Hartlik welkom aan julle almal hier op WordPress se Afrikaanse afdeling. Mag julle groot vreugde uit julle blogs put en sommer baie aanhangers en blogvriende bykry.

  • Komkommertyd is verby

    Al die vakansiejolyt van die afgelope feesseisoen is nou so te sê op ‘n einde. Diegene van julle wat nog ‘n ekstra week vakansie kan inpas moet dit baie geniet. Daar is ook diegene van ons vir wie dit weer tyd is om weer terug te keer werk toe met sy gewone daaglikse pligte wat op ons wag. Diegene wat kinders op skool het moet ook sorg dat hulle al hulle skoolbenodigdhede het. Skoolklere en skryfbehoeftes moet aangekoop word en daar moet ook gesorg word dat hulle hare mooi kort gesny word. Ek sien op my almanak die skole begin reeds op 13 Januarie.
    Verder begin die radio- en televisiedienste weer met hulle normale programskedules. Die rustige vakansieprogramme is nou op ‘n einde. Die nuus gaan nou weer begin spoed optel en die politici gaan weer hulle praatjies begin praat. Asseblief, dames en here, doen tog die moeite om vanjaar meer verantwoordelike uitsprake te maak.
    Ek wens julle weereens ‘n voorspoedige nuwe jaar toe. Mag dit julle nie te lank vat om weer by die vervelende daaglikse roetine in te skakel nie.

  • Die oujaar lê op sy rug

    Op hierdie oujaarsdag is dit mos maar almal se gewoonte om terug te kyk na die hoogte- en laagtepunte van die jaar. Hier is ‘n paar enkeles wat vir my uitgestaan het.
    Vanjaar was ‘n verkiesingsjaar en Jacob Zuma en die ANC was soos gewoonlik die gunstelinge om hierdie verkiesing te wen omdat die ANC so ‘n geweldige meerderheid steun het. Daar was egter ‘n groot probleem omdat die Nasionale Vervolgingsgesag aanklagte van korrupsie teen Zuma ondersoek het. Teen die einde van Maart het hulle toe op hoogs omstrede wyse besluit om nie voort te gaan met die vervolging nie. Jacob Zuma se pad na die presidensie was nou oop. Op 22 April is die verkiesing gehou wat aan Zuma die presidentskap van Suid-Afrika besorg het.
    In dieselfde tyd was daar ook ‘n politieke opskudding toe ‘n nuwe party, Congress of the People, op die toneel verskyn het. Hierdie nuwe party is meestal saamgestel uit ‘n groep hoëprofiel politici wat die ANC verlaat het. Alhoewel die ANC dit nooit sal erken nie was hulle maar baie skrikkerig vir hierdie party. Daar was heelwat intimidasie teenoor mense wat COPE se saamtrekke bygewoon het. Verder het die ANC ook ‘n sogenaamde “war room” begin waar hulle COPE se leierskap direk kon teiken deur ou geraamtes uit hulle ANC-kaste te voorskyn te bring, d.w.s. al die dinge wat hulle na bewering verkeerd sou gedoen het toe hulle nog by die ANC was. Op die ou end het COPE toe die derde meeste stemme gekry in die verkiesing.
    Op 9 Mei word Jacob Zuma as president ingehuldig en op 10 Mei kondig hy sy nuwe kabinet aan. Die kabinet is vergroot en daar is ook veranderinge an portefeuljes aangebring. Selfs iemand soos Pieter Mulder van die Vryheidsfront Plus het ‘n pos gekry as adjunk-minister van landbou, bosbou en visserye. Dit het groot ongelukkigheid binne behoudende Afrikanergeledere veroorsaak omdat baie mense gevoel het dat Mulder nie meer sy rol as opposisieleier effektief sal kan vervul nie.
    Die nuwe H1n1 griepvirus het ook vanjaar wêreldwyd paniek veroorsaak en tot die dood van meer as twaalfduisend mense gelei. In vergelyking met ander lande het Suid-afrika relatief lig daarvan afgekom.
    Die bekende popster Michael Jackson het op 25 Junie skielikgesterf aan hartversaking. Op die ou end kom dit toe uit dat sy dood te wyte is aan ‘n oordosis medikasie wat sy dokter voorgeskryf het.
    Die Springbokke het vanjaar die Drienasiesbeker gewen. Die Bloubulle het die Super 14 reeks sowel as vanjaar se Currybeker gewen.
    Verder was daar ‘n paar stakings, betogings en despute wat my nogal kriewelrig gehad het. Daar was die staking van die brandstoflorriedrywers wat vulstasie se pompe op party dorpe laat opdroog het. Daar was gewelddadige betogings oor swak dienslewering deur plaaslike owerhede wat baie dorpe in rep en roer gehad het. Daar was die geskil tussen die taxi-unies en die regering oor die beplande nuwe snelbusstelsel in groot stede. Verder was daar ook ‘n staking by die Sauk wat uitsendings vir ‘n dag of wat negatief geraak het.
    Hierdie was maar ‘n paar punte wat vir my hierdie jaar uitgestaan het.
    Ek wil graag van die geleentheid gebruik maak om al die lesers en deelnemers ‘n voorspoedige nuwe jaar toe te wens. Die nuwe jaar gaan beslis ‘n onsekere jaar wees. Ons is nog steeds vasgevang in die gevolge van ‘n wêreldwye resessie en ons weet nog nie of ons in die komende jaar genoegsaam sal kan herstel nie. Evkom beplan om sy tariewe op te stoot en ons sal maar moet sien hoe dit ons ekonomiese herstel en die skep en/of verlies van werksgeleenthede gaan raak. Verder moet ons ook nog sien of Suid-Afrika ‘n sukses van die Wêreldbeker Sokkertoernooi gaan maak. Maar mag dit tussen alles deur nog steeds vir julle voorspoedig wees.

  • Geseënde Kersfees

    Ek wil graag van hierdie geleentheid gebruik maak om al my lesers en deelnemers op hierdie blog ‘n geseënde Kersfees toe te wens. Mag julle hierdie feestyd saam met julle gesinne, families en geliefdes geniet. As alles goed gaan plaas ek op Oujaarsdag ‘n inskrywing om julle almal ‘n voorspoedige nuwe jaar toe te wens en om so bietjie terug te dink aan gebeure van hierdie jaar.

  • Dis warm vannag

    Dis vannag weer een van daardie warm soel somersnag na ‘n lang warm dag. Warm somersdae is ‘n gegewe, maar dis nagte soos hierdie wat my omkrap omdat mens sukkel om te slaap. Boonop voel jy altyd dors en gaan soek jy gereeld iets koels om te drink. Ek hoop net hierdie hittegolf trek oor voor Kersfees.

  • geloftedag

    vandag herdenk ons behoudende Boere-afrikaners weer die gelofte wat ons voorvaders afgelê het voor die slag van Bloedrivier. Hulle het God destyds belowe dat indien Hy hulle sou beskerm tydens die geveg en aan hulle die oorwinning sou gee, sou hulle hierdie dag as ‘n sabbatdag deurbring en ‘n huis tot Sy eer oprig waar dit Hom mag behaag. Hulle het ook belowe dat hulle kinders en die opkomende geslagte daarna ook in hierdie gelofte moet deel. Daarom gedenk ons vandag nog Geloftedag.
    Mag diegene van julle wat dit vandag herdenk dit steeds met dank teenoor God doen.

  • Ons lyding in Afrika

    Steve Hofmeyer skryf op sy webjoernaal, te besigtig by stevehofmeyer.co.za onder die afdeling Steve sê ‘n interessante opmerking as deel van sy Kersfeesboodskap. Die groot ding wat die inwoners van Afrika aan hierdie kontinent bind is die feit dat daar altyd mense op hierdie kontinent is wat die een of ander groot lyding of beproewing beleef. Die Afrikanervolk, en meer spesifiek die Boere-Afrikaners, kan met reg sê dat hulle ook die lyding van die kontinent beleef het.
    Ons het onder die juk van die Nederlandse en later die Engelse koloniale magte uitgevlug. Die koloniale owerhede het gereeld die grense van die kolonie uitgebrei om ons as’t ware met ‘n vangnet weer onder die gesag van die koloniale magte in te trek. Ons het voortgetrek en toe ons ons grond kry waar ons ons eie nuwe land wou bou het ons dit teen die koloniale magte verdedig en dit toe opgebou en leefbaar gemaak.
    Ons was ook vasgevang in die stamoorloë wat in Suid-Afrika gewoed het nadat Tsjaka met sy uitdelgingsoorlog begin het. Die Mfekane het eers opgehou nadat Die bVoortrekkers vir Dingaan verslaan het.
    Britanje het in 1877 die ZAR ingeneem en na vele mislukte onderhandelings en verset het ons dit in 1881 weer bevry by die slag van Majuba.
    Nadat goud aan die Witwatersrand ontdek is was daar weer ‘n lang en bitter politieke stryd tussen die ZAR en Britanje wat op die Tweede Vryheidsoorlog uitgeloop het. Baie van ons vrouens en kinders het in konsentrasiekampe omgekom en plase is oral afgebrand en verwoes om ons mense se voedselbronne af te sny.
    Na die oorlog moes ons weer opstaan uit die na-oorlogse armoede en het ons met behulp van ons welsynsorganisasies, kulturele organisasies en banke dit reggekry om onsself weer tot ‘n respektabele volk op te hef.
    Daar was weer lig in die tonnel toe ons ons eie afrikanerregering gekry het wat ons na onafhanklikheid en voorspoed gelei het.
    Ongelukkig weens internasionale druk met Britanje wat weereens ‘n belangrike rol gespeel het asook verraad van binne moes ons ons vryheid en voorspoed prysgee. Nou ly ons weer van voor af as gevolg van diskriminasie, armoede en volksmoord wat as misdaad vermom word.
    Die Afrikanervolk het inderdaad die lyding van Afrika meegemaak. Daarom het ons so ‘n sterk verbintinis met ons land.